Varaþingmaður vill að forseti skýri afstöðu sína í Icesave málinu

Ólafur Ragnar Grímsson, forseti Íslands, þarf að útskýra hvers vegna hann synjaði fjölmiðlalögunum staðfestingar en ekki lögum um ríkisábyrgð á Icesave-reikningum Landsbankans, segir Sigurður Kári Kristjánsson, varaþingmaður Sjálfstæðisflokksins og aðstoðarmaður Bjarna Benediktssonar formanns flokksins.

Sigurður Kári segir á vefsíðu sinni að líkt og í fjölmiðlamálinu hafi í Icesave málinu skort á samhljóminn sem þurfi að vera á milli þings og þjóðar í svo mikilvægu máli. Bendir Sigurður Kári á tvennar skoðanakannanir sem hafi verið gerðar á afstöðu þjóðarinnar til málsins, önnur sem birtist í fréttum Ríkisútvarpsins og hin sem birtist á Vef-Þjóðviljanum.

Sigurður Kári segir að þær útskýringar sem fram komu í yfirlýsingu forsetans í gær dugi ekki. Yfirlýsingin sé í raun óskiljanleg því hvergi í stjórnarskrá sé gert ráð fyrir því að forseti Íslands staðfesti lög með „sérstakri áritaðri tilvísun til fyrirvara Alþingis" eða geti bundið staðfestingu sína einhverjum skilyrðum eða fyrirvörum.

Bjarni Benediktsson, formaður Sjálfstæðisflokksins, sagði í fréttum Stöðvar 2 um helgina að hann teldi ekki að forseti Íslands ætti að synja Icesave lögunum um samþykki.