Þúsundir mótmæltu á Vesturbakkanum

Að minnsta kosti einn lét lífið og fimm særðust í loftárásum Ísraelshers á Gazaströndina í dag. Til átaka kom á Vesturbakkanum þegar þúsundir manna mótmæltu árásum Ísraelsmanna.

Um fjögur hundruð manns hafa látið lífið í loftárásum Ísraelsmanna á Gazaströndina undanfarna viku. Á sama tíma hafa fjórir Ísraelsmenn látið lífið í flugskeytaárásum Hamasliða á Ísrael.

Einn lét lífið og fimm særðust í loftárásum ísraelsmanna í dag.

Þúsundir manna fylgdu Nizar Rayan, hátt settum meðlimi Hamas-samtakanna til grafar í dag. Rayan lét lífið ásamt eiginkonum sínum og ellefu börnum þegar ísraelsmenn sprengdu heimili hans í loft upp í gær. Gríðarlega mikil reiðir var meðal fylgdarmanna sem hrópuðu slagorð gegn Ísrael og kröfðust hefnda.

Árásum Ísraelsmanna var víða mótmælt í dag meðal annars í Jórdaníu, Tyrklandi og Ástralíu.

Á Vesturbakkanum kom til átaka milli ísraelskra hermanna og mótmælenda sem brenndu ísraelska fána og köstuðu grjóti í átt að hermönnum.

Bandaríkjamenn reyna nú að miðla málum til að koma í veg fyrir að átökin stigmagnist enn frekari.