Ögmundur: Afstaða mín ræðst af framvindu málsins í þinginu

2. júlí 2009 15:38

„Ég ætla að láta mína afstöðu ráðast á framvindu málsins í þinginu," sagði Ögmundur Jónasson, heilbrigðisráðherra, í umræðum um ríkisábyrgð vegna Icesave-samkomulagsins á Alþingi í dag. Hann sagði að þjóðin verði með siðferðislega timburmenn í 300 ár ef Íslendingum tekst ekki að leiða hið sanna og rétt í ljós og finna peninga sem skotið var undan. Ögmundur hefur áður, líkt og nokkrir þingmenn Vinstri grænna, lýst yfir efasemdum með samkomulagið.

Steingrímur J. Sigfússon, fjármálaráðherra, mælti fyrr í dag fyrir frumvarpi um ríkisábyrgð á lántöku tryggingarsjóðs innstæðueigenda og fjárfesta vegna Icesave-samkomulagsins.

Ögmundur sagði að málið megi ekki hafna í hefðbundnum hjólförum stjórnmálamanna. „Þetta er mál sem við þurfum að takast á við sem Íslendingar óháð flokkslínum."

Ráðherrann sagðist hafa heitið því gagnvart sjálfum sér að taka ekki afdrifaríkar ákvarðanir sem skuldbindi annað fólk án þess að þekkja ekki alla málavöxtu. „Ég ætla líka að fylgjast með því hvernig stjórnarandstaðan kemur að þessu máli."

Vigdís Hauksdóttir, þingmaður Framsóknarflokksins, og Þorgerður Katrín Gunnarsdóttir, varaformaður Sjálfstæðisflokksins, sáu ástæðu til að hrósa Ögmundi sérstaklega fyrir ræðuna.

Tengdar fréttir

Höfnun Icesave setur AGS samkomulagið í uppnám

Ekki er hægt að skilja orð Franek Rozwadowski fulltrúa Alþjóðagjaldeyrissjóðsins í samtali við Bloomberg öðruvísi en svo að ef alþingi hafnar Icesave-samningnum sé samkomulag Íslands við AGS þar með komið í uppnám.

2. júlí 2009 09:39

Össur: Sjálfstæðismenn eru skræfur

„Sjálfstæðismenn eru slíkar skræfur að þeir þola ekki að aðkoma þeirra að málinu sé rifjuð upp,“ sagði utanríkisráðherra í umræðum um ríkisábyrgð vegna Ícesave-samkomulagið á Alþingi í dag. Rök ráðherrans í málinu er samfelldur brandari, að mati formanns Sjálfstæðisflokksins.

2. júlí 2009 13:20

Steingrímur: Samkomulagið hluti af herkostnaðinum

„Þetta er hluti af herkostnaðinum sem við sitjum uppi með," sagði Steingrímur J. Sigfússon, fjármálaráðherra, um ríkisábyrgð vegna Icesave-samkomulagsins á Alþingi í dag. Ráðherrann sagði skítt að Íslendingar sitji uppi með afleiðingar andvaraleysis stjórnvalda undanfarinna ára. Þá fullyrti Steingrímur að milljarðarnir sem fengust fyrir Landsbankann þegar hann var einkavæddur á sínum tími hafi verið þeir dýrustu í sögu Íslands.

2. júlí 2009 11:49

Ráðherrar seinir í seinni hluta Icesave umræðna

Þegar umræður um ríkisábyrgð á Icesave hófust eftir fundarhlé klukkan 13:30 voru hvorki forsætisráðherra né fjármálaráðherra viðstaddur. Kvað hver stjórnarandstæðingurinn sér hljóðs á fætur öðrum og krafðist þess að ráðherrarnir sýndu umræðunni þá lágmarksvirðingu að vera viðstaddir hana.

2. júlí 2009 13:43

Atli Gíslason: Kannski betra að lýsa yfir þjóðargjaldþroti

Geti Íslendingar ekki staðið undir erlendum skuldbindingum blasir við þjóðargjaldþrot. Þetta er mat stjórnarþingmannsins Atla Gíslasonar. Hann segist ekki munu samþykkja Icesave samninginn reynist það rétt að erlendar skuldir nemi 250 prósentum af landsframleiðslu.

2. júlí 2009 12:13

Mest lesið

Fleiri fréttir