Dr. Dauði lést í Kaíró 1992

Þýski stríðsglæpamaðurinn Aribert Heim lést í egypsku borginni Kaíró árið 1992, samkvæmt nýrri rannsókn.

Þýska útvarpsstöðin ZDF greindi frá þessu í gær og sagði ítarlegar rannsóknir hafa leitt í ljós að maður að nafni Tarek Farid Hussein hafi í raun verið Heim. Efraim Zuroff hjá Simon Wiesenthal-stofnuninni segir þetta harmafregn, reynist hún sönn, og kveður það skelfileg vonbrigði að Aribert Heim hafi komist hjá refsingu. Zuroff er einn af helstu eftirleitarmönnum stríðsglæpamanna úr röðum nasista og segist hann í viðtali við CNN munu rannsaka öll gögn málsins í þaula.

Hann lýsir Heim sem einum hættulegasta stríðsglæpamanni nasista fyrr og síðar. Wiesenthal-stofnunin hafi verið að því komin að hækka verðlaun fyrir upplýsingar er leitt gætu til handtöku hans úr rúmum 300.000 evrum í eina milljón evra þegar fregnir bárust af andlátinu.

Heim starfaði sem læknir í Mauthausen-útrýmingarbúðunum í Austurríki og gekk þar undir hinu huggulega viðurnefni dr. Dauði en hann stjórnaði mjög vafasömum tilraunum á föngunum. Hann var upphaflega hreinsaður af ásökunum um stríðsglæpi en árið 1962 ákváðu þýsk yfirvöld að fyrirskipa handtöku hans.