Fimmtíu og eitt lík fundið úr Air France vélinni

Tvöhundruð tuttugu og átta manns fórust með Air France flugi 447. Meðal þeirra var einn Íslendingur. Búið er að bera kennsl á ellefu lík, þar á meðal af flugstjóra vélarinnar og einum flugþjóni.

Enn er allt á huldu um ástæðuna fyrir slysinu. Þó er vitað að hún lenti í mikilli ókyrrð og að sjálfvirkir sendar um borð í vélinni sendu tilkynningar um stórfelldar bilanir í rafkerfi hennar.

Brakið úr vélinni var dreift yfir margra kílómetra svæði sem bendir til þess að hún hafi sundrast á flugi, hver svo sem ástæðan var.

Brasiliski flotinn hefur nú hætt leit að líkum. Talsmaður hans segir að ekkert lík hafi nú fundist í níu daga og líkurnar séu sáralitlar á því að fleiri finnist. Talsvert brak úr vélinni fannst einnig.

Svarti kassinn svokallaði sem geymir upplýsingar um flugferlið er hinsvegar ófundinn.

Frönsk herskip eru enn á staðnum við að reyna að nema hljóðmerki frá honum en tíminn er óðum að styttast.

Kassinn sendir frá sér hljóðmerki í þrjátíu daga eftir slys. Vélin fórst hinn fyrsta þessa mánaðar og því ekki margir dagar til stefnu.

Bandaríski flotinn hefur sent fjarstýrðan kaftbát á vettvang sem er sérhannaður til að finna flugrita.

Famleiðandi kafbátsins sagði í viðtali við CNN fréttastofuna að fram til þessa hafi allir flugritar fundist sem leitað hefur að með bátnum.