Byltingarráðið ógildir ekki forsetakosningarnar

Byltingarráðið í Íran ætlar ekki að ógilda forsetakosningarnar sem fram fóru í landinu fyrr í mánuðinum enda bendi ekkert til alvarlegra annmarka á framkvæmd þeirra. Stjórnarandstæðingnar eru hvattir til að mótmæla frekar.

Tveir frambjóðendur í kosningunum sem lutu í lægra haldi fyrir Mahmoud Ahmadinejad, forseta Írans, í kosningunum tólfta þessa mánaðar hafa sakað forsetann og stuðningsmenn hans um kosningasvik og krafist þess að kosið verði aftur. Kærur voru lagðar fyrir byltingaráðið og í gær var staðfest í írönskum miðlum að fleiri hefðu kosið á sumum kjörstöðum en voru á kjörskrá.

Ráðið svaraði því til að það skýrðist af því að margir Íranar kusu annars staðar en þeir voru skráðir, auk þess sem munurinn væri innan við þrjár milljónir atkvæða og því ekki til að breyta úrslitum þegar munurinn á Ahmadinejad og Mir Hussein Mousavi sem varð í öðru sæti hafi verið um ellefu milljónir atkvæða.

Í yfirlýsingu ráðsins í morgun er síðan tilkynnt að ekki verði kosið á ný þar sem engir alvarlegir annmarkar hafi verið á framkvæmd kosninganna. Engin alvarleg brot á reglum framin eða um svik að ræða.

Mótmæli hafa verið nokkur í Íran síðustu rúma vikuna vegna kosninganna og mótmælendur fallið í átökum við lögreglu, þar á meðal tíu á föstudaginn þegar Ali Khamenei æðstiklerkur bannaði útifundi. Um þúsund stjórnarandstæðingar mótmæltu í miðborg Teherans í gær, töluvert færri en dagana á undan. Táragasi var sprautað og kylfum beitt.

Forsetaframbjóðandinn Mehdi Karoubi hvetur til fjölmennra mótmæla á fimmtudaginn þar sem föllnum mótmælendum verði vottuð virðing.

Ban Ki-moon, framkvæmdastjóri Sameinuðu þjóðanna, hvatti í morgun til að hætt yrði að beita ofbeldi á götum Teherans. Hann hvetur írönsk stjórnvöld til að virða grundvallar mannréttindi, þar á meðal fundar- og tjáningarfrelsi. Hætta skuli ofbeldi og handtökum.