Mestu mótmælaaðgerðir í Íran í 30 ár

Að minnsta kosti sjö hafa verið skotnir til bana á götum Teherans í Íran síðasta sólarhring, í stærstu mótmælaaðgerðum sem fram hafa farið í landinu í þrjátíu ár.

Hundruð þúsundir stuðningsmanna Mir Hossein Mousavis sem laut í lægra haldi fyrir sitjandi forseta, Mahmoud Ahmadinejad, söfnuðust saman á götum Teheran í gær, þrátt fyrir bann stjórnvalda um að halda mótmælin.

Að sögn fréttamanna á svæðinu réðust mótmælendur að varðstöð hersins sem endaði með skotárás. Þá hafa mótmælendur verið handteknir með sprengjuefni og skotvopn. Ekkert lát er á mótmælunum en búið er að boða til áframhaldandi mótmæla í dag. Óeirðirnar hófust eftir að úrslit forsetakosninganna lágu fyrir á föstudaginn. Mousavi segir að um kosningasvindl hafi verið að ræða og krefst þess að kosningin verði ógild og að kosið verði að nýju.

Til greina kemur að endurtelja atkvæði í þeim kjördæmum þar sem kosningar voru dregnar í efa, en Ali Khamenei, æðsti klerkur Írans og valdamesti maður landsins, sem áður hafði lýst yfir stuðningi við niðurstöðu kosninganna skrifaði í gær byltingarráðinu - tólf manna ráði sem gegnir lykilhlutverki í stjórnskipan Írans - og óskaði eftir að ráðið rannsakaði ásakanir Mousavis. Ráðið segist tilbúið að endurtelja atkvæðin en að ekki komi til greina að ógilda kosninguna.