Mousavi hvetur mótmælendur í Íran

Mir Hossein Mousavi, forsetaframbjóðandi og leiðtogi írönsku stjórnarandstöðunnar, hvetur fylgismenn sína til að halda áfram mótmælum gegn endurkjöri Mahmoud Ahmadinejad forseta.

Í gærkvöldi mátti heyra skothvelli í ýmsum hverfum höfuðborgarinnar Tehran og sveimuðu þyrlur yfir borginni í eftirlitsferðum. Mousavi bað mótmælendur að standa fast á sínu og mótmæla lygum og kosningasvikum. Þá hefur hann einnig opinberlega beðið öryggissveitir um að taka rólega á mótmælendum og leyfa þeim að koma sínu fram.

Ríkissjónvarp Írans greindi frá því í gær að tíu manns hefðu látist og yfir 100 slasast í blóðugum átökum sem urðu í kjölfar mótmæla á laugardaginn. Yfirvöld í Íran halda því fram að mótmælendurnir séu ekkert annað en ótíndir hryðjuverkamenn sem standi fyrir ólöglegum uppþotum í landinu.

Lögreglustjórinn í Tehran, Azizullah Rajabzadeh, segir lögregluna munu taka af fullri hörku á öllum frekari mótmælum og ekki sýna neina linkind. Enn fremur hefur Hassan Qashqavi, talsmaður utanríkisráðuneytis Írans, ásakað vestræna fjölmiðla um að ýta undir stjórnleysi og glundroða með umfjöllun sinni.