Ætla að ganga frá janúarkaupunum sem fyrst

Mark Bowen, aðstoðarstjóri Manchester City, segir að félagið leggi áherslu á að ganga frá kaupum sínum í félagaskiptaglugganum í janúar sem allra fyrst.

Mark Hughes, stjóri City, segir stefnuna að fá fimm nýja leikmenn í janúar. „Það væri best að vera komnir með alla leikmenn 1. janúar. Það er þó ekki mjög raunhæft. Við eigum sex leiki í janúar svo við viljum fá þessa nýju menn sem fyrst," sagði Bowen.

„Við erum mikið í umræðunni því allir vita að við getum gert stóra hluti í janúarglugganum. Vonandi tekst okkur að fá rétta leikmenn og lyfta okkur upp töfluna," sagði Bowen en City er sem stendur í 14. sæti.

Líklegt er að búlgarski sóknarmaðurinn Valeri Bojinov snúi aftur af meiðslalistanum í janúar. Hann hefur átt við erfið meiðsli að stríða síðan hann var keyptur frá Fiorentina árið 2007.

Bojinov hefur aðeins byrjað einn leik í ensku úrvalsdeildinni fyrir City. Hann er nú í endurhæfingu og gengur hún vel. Vonast er til að hann geti aftur farið að spila um miðjan janúar.