Farið hefur fé betra, segja Bandaríkjamenn um Mughniyeh

Talsmenn á vegum ríkisstjórna Bandaríkjanna og Ísraels fögnuðu því Imad Mughniyeh, einn af leiðtogum Hizbollah-samtakanna í Sýrlandi, skyldi vera ráðinn af dögum í bílsprengjuárás í Damaskus í morgun.

Eins og fram kom í fréttum fyrr í dag saka Hizbollah Ísraela um að standa á bak við morðið en því vísuðu ísraelsk yfirvöld á bug. ,, Ísraelsk stjórnvöld hafna því að hryðjuverkahópar reyni að tengja þau við atvikið," sagði í tilkynningu frá skrifstofu Olmerts, forsætisráðherra Ísraels.

Fyrrverandi yfirmaður ísraelsku leyniþjónustunnar Mossad, Danny Yatom, fagnaði hins vegar andláti Mughniyeh og sagði það mikinn áfanga í baráttunni við hryðjuverkasamtök.

Í svipaðan streng tók talsmaður bandaríska utanríkisráðuneytisins, Sean McCormack sem sagði að Hizbollah-leiðtoginni fyrrverandi væri ,,kaldrifjaður morðingi, fjöldamorðingi og hryðjuverkamaður sem ber ábyrgð á því að fjöldi manna saklausra manna lést. Á einn eða annan hátt var náði armur laganna til hans."

Annað hljóð var í strokknum hjá bæði sýrlenskum stjórnvöldum og Írönum. Sýrlensk stjórnvöld sögðu rannsókn á dauða Mughniyah standa yfir og fordæmdu morðið sem verk hugleysingja. Íranar fordæmdu einnig morðið og sögðu Mughniyah hafa fallið sem píslarvott. Morðið væri enn eitt dæmið um skipulögð hryðjuverk Ísraelsstjórnar.

Mughniyeh hafði verið í felum árum saman. Hann er talinn hafa staðið á bak við fjöldamargar gíslatökur í Líbanon á níunda áratug síðustu aldar og bera ábyrgð á árásum gegn Ísrael, meðal annars ísraelskum skotmörkum í Argentínu sem kostuðu yfir hundrað manns lífið.

Var hann talinn vera stjórnandi sérsveitarms hins herskáa hluta Hizbollah sem barðist við Ísraela í Líbanon sumarið 2006. Hann var á lista Bandaríkjanna og Ísraels yfir eftirlýsta menn og er talið að fráfall hans sé mikið áfall fyrir Hizbollah.