Borgarráð samþykkir að gera Reykjavík að kvikmyndaborg

Borgarráð samþykkti á fundi sínum í dag tillögu borgarstjóra um að kanna hvort og þá hvar er hægt að reisa kvikmyndaþorp í Reykavík. Þá  á Höfuðborgarstofa að verða miðstöð í samskiptum Reykjavíkurborgar og kvikmyndagerðarmanna og þar eiga kvikmyndagerðarmenn að geta úrlausn erinda sinna á einum stað.

Fram kemur í fundargerð borgaráðs að Höfuðborgarstofa eigi meðal annars að tengja aðrar stofnanir og svið sem koma að leyfisveitingum og annarri þjónustu við kvikmyndagerð.

Þá verður Höfuðborgarstofu einnig falið að kynna kvikmyndaborgina Reykjavík í samstarfi við innlenda og erlenda aðila. Fær stofan þriggja milljóna króna aukafjárveitingu á þessu ári vegna þessara nýju verkefna. Gert er ráð fyrir að í fjárhagsáætlun næstu þriggja ára verði fimm milljóna króna árlegt framlag til verkefnisins.

Auk þess er menningar- og ferðamálasviði falið að undirbúa gerð samninga um að efla til muna Alþjóðlegu kvikmyndahátíðina í Reykjavík - Reykjavík International Film Festival. „Í því sambandi verði einnig litið til stórbættra möguleika til kvikmyndasýninga og tengdrar starfsemi í endurgerðu Tjarnarbíói samhliða heildstæðri framtíðarstefnumörkun um nýtingu þess fyrir sjálfstæða leikhópa. Samningurinn verði til þriggja ára og komi til afgreiðslu borgarráðs," segir í fundargerð borgarráðs.

Samkvæmt tillögunni verður skipulags- og byggingarsviði falið að kanna raunhæfni og hugsanlegar staðsetningar fjölnota kvikmyndavers - kvikmyndaþorps - í Reykjavík á grundvelli fyrirliggjandi þarfagreiningar og áhuga af hálfu fjölmargra lykilaðila í reykvískri kvikmyndagerð. Í kjölfarið verði tekin afstaða til verkefnishugmyndarinnar í heild.

Tillagan var samþykkt um leið og stýrihópi um Kvikmyndaborgina Reykjavík var þakkað fyrir vel unnin störf og spennandi tillögur. Lýsir borgarráð yfir eindregnum vilja til þess að skapa sem ákjósanlegust skilyrði í borginni fyrir innlenda og alþjóðlega kvikmyndagerð.