Chimbonda í viðræðum við Sunderland

Franski bakvörðurinn Pascal Chimbonda hjá Tottenham hefur átt í viðræðum við Sunderland með það fyrir augum að skipta um félag. Hann hefur ekki átt fast sæti í liði Tottenham síðan skoski landsliðsmaðurinn Alan Hutton var keyptur til Lundúnafélagsins í janúar.

Chimbonda gekk í raðir Tottenham frá Wigan árið 2006, en þó hann hafi á tíðum leikið vel, hefur hann átt það til að koma sér í vandræði með yfirlýsingum sínum.

Umboðsmaður bakvarðarins segir Chimbonda hafa litist vel á áform Roy Keane hjá Sunderland, en breskir fjölmiðlar segja að Sunderland hafi einnig áhuga á Tottenham-mönnunum Steed Malbranque, Teemu Tainio og Younes Kaboul.