Scolari vill afsökunarbeiðni frá dómurum

Luiz Felipe Scolari, stjóri Chelsea, vill að Mike Dean og félagar sem dæmdu leik Chelsea og Arsenal í dag biðjist afsökunar á mistökum sínum á morgun.

Chelsea hafði 1-0 forystu í leiknum þegar Robin Van Persie jafnaði með marki sem hefði ekki átt að standa vegna rangstöðu. Hann fullkomnaði svo ófarir Chelsea með því að skora sigurmarkið á meðan leikmenn Chelsea voru enn að melta fyrra markið.

"Ég vil að dómarinn horfi á sjónvarpið og sjái að hann og línuverðirnir hafi haft rangt fyrir sér. Ég vil að þeir biðjist afsökunar - það er allt og sumt. Ég vil ekki þrjú stig, ég vil bara að þeir viðurkenni að þeir hafi gert mistök. Við viljum fá dómara á Stamford Bridge sem dæmir fyrir bæði lið - ekki bara annað þeirra," sagði Scolari.

"Ég er búinn að vera hérna í 15 leiki í deildinni, bikarleiki og Evrópuleiki og ég hef ekki sagt stakt orð um dómarana - en í dag er annað uppi á teningnum," sagði Scolari.

Hann sagði að dómarinn hefði gert mistök á hinum enda vallarins líka og sagði að rangstöðumark Van Persie hefði slegið sína menn út af laginu.