Kaka vill fara til Chelsea

Ráðgjafi miðjumannsins Kaka hjá AC Milan segir að leikmaðurinn vilji ólmur fara til Chelsea á Englandi og spila undir landa sínum Luiz Felipe Scolari.

Sagt er að Milan gæti verið tilbúið að selja Brasilíumanninn snjalla, en það yrði þá væntanlega fyrir metfé.

"Real Madrid var tilbúið að kaupa hann á 71 milljón punda í fyrra, en Milan vildi ekki einu sinni ræða það. Nú er öldin önnur og nú erum við nokkuð vissir um að eitthvað gerist. Ef Kaka færi til Chelsea myndi það þýða að hann fengi hærri laun og stóra sneið af kaupverðinu. Chelsea er félagið til að spila fyrir í dag því þar á bæ ætla menn sér að vinna alla titla í boði," sagði ráðgjafi Kaka.