Hizbolla óttast árásir Ísraela

Sayyed Hassan Nasrallah, leiðtogi Hizbolla-samtakanna, hefur beðið liðsmenn sína í suðurhluta Líbanons að vera vel á verði vegna hugsanlegara loftárása Ísraela.

,,Við stöndum andspænis illum óvin og við vitum ekki hverjar fyrir áætlanir hans eru," sagði leiðtoginn í ávarpi í suðurhluta Beirút, höfuðborgar Líbanons, í dag.

Hizbolla hefur lengi verið ríki í ríkinu, í Líbanon. 34 daga stríð hófst sumarið 2006 á milli Líbanons og Ísraels eftir að liðsmenn samtakanna réðust yfir landamærin til Ísraels, drápu þar átta hermenn og rændu tveim til viðbótar.

Nasrallah telur allt eins líklegt að Ísraelar hefji hernað gegn samtökunum líkt og gegn Hamas á Gaza-svæðinu. Tala fallina í loftárásum Ísraela á Gaza nálgast þriðja hundrað og yfir sex hundruð manns hafa særst.

Leiðtoginn sagði fyrr á árinu að samtökin séu reiðbúin að fara í stríð við Ísrael.