David Ngog til Liverpool

Rafael Benítez hefur gengið frá kaupum á franska sóknarmanninum David Ngog frá Paris St Germain. Þessi efnilegi nítján ára leikmaður hefur skrifað undir fjögurra ára samning við Liverpool.

Ngog er frændi varnarmannsins Jean-Alain Boumsong og skoraði hann eitt mark í átján leikjum fyrir PSG síðasta tímabil. Ngog er fjórði leikmaðurinn sem Liverpool kaupir í aðallið sitt í sumar.

Hinir eru Andrea Dossena, Diego Cavalieri og Philipp Degen. Benítez er ekki hættur á leikmannamarkaðnum en hann er á eftir Gareth Barry, fyrirliða Aston Villa, og Robbie Keane, sóknarmanni Tottenham.