Rooney tryggði United sigur á City - Ronaldo sá rautt

Wayne Rooney skoraði eina mark leiksins í dag þegar Manchester United vann langþráðan sigur á grönnum sínum í Manchester City.

Gestirnir í United voru heldur sterkari í leiknum og Rooney skoraði það sem reyndist vera sigurmarkið á 42. mínútu þegar hann fylgdi eftir skoti Michael Carrick. Þetta var 100. mark kappans á ferlinum.

Rooney, Ronaldo og Berbatov áttu allir ágæt færi í leiknum en Stephen Ireland átti besta færi City þegar hann skaut í stöng og Benjani skaut framhjá úr ágætu færi.

City fékk kjörið tækifæri til að sækja til sigurs á 68. mínútu þegar Ronaldo var vísað af velli fyrir að slæma hendinni í boltann og fékk hann þar með sitt annað gula spjald.

Heimamönnum tókst þó ekki að jafna metin og sitja í 14. sæti deildarinnar með aðeins 17 stig en United er í þriðja sætinu með 28 stig.