Fyrrum leikmaður Barcelona í ensku utandeildina

Fyrrum leikmaður Barcelona hefur gengið til liðs við enska utandeildarliðið Northwich Victoria.

Hér ræðir um fyrrum nígeríska landsliðsmanninn Gbenga Okunowo sem lék með Börsungum tímabilið 1998-9 þegar liðið var undir stjórn Louis van Gaal. Hann lék fjórtán leiki á tímabilinu, þar af gegn Manchester United í Meistaradeildinni.

Síðan þá hefur hann leikið í Úkraínu, Rúmeníu, Íran og Grikklandi. Hann lék með nígeríska landsliðinu í Afríkukeppninni árið 2000 og á Ólympíuleikunum sama ár.

Hann er 29 ára gamall en hefur mátt glíma við þrálát meiðsli á sínum ferli.

„Við þurfum að koma honum í gott form," sagði Steve King, knattspyrnustjóri Northwich. „En hann hefur spilað víða í mjög sterkum deildum og það er enginn vafi um að hann gæti styrkt vörnina okkar. Ef við komum honum í form og hann spilar vel er enginn vafi um að hann verði lengi í herbúðum félagsins."