Fletcher: Scholes sá besti

Miðjumaðurinn Paul Scholes hjá Manchester United er á góðum batavegi en hann hefur verið frá síðan í september. Talið er að hann snúi aftur í lið United í leik gegn Álaborg í Meistaradeildinni 10. desember.

Darren Fletcher vonast til að Scholes komi aftur sem fyrst þó hann muni ógna stöðu sinni í liðinu. „Paul er enn besti miðjumaður Evrópu að mínu mati, ef ekki sá besti í heimi," segir Fletcher.

„Enginn getur stjórnað leik eins og hann. Það verður frábært fyrir United þegar hann kemur aftur í liðið og allir hjá félaginu bíða eftir því," segir Fletcher sem hefur leikið lykilhlutverk hjá United það sem af er félagi eftir að hafa verið í aukahlutverki síðustu ár.

„Manchester United er frábært félag og ég vil ekki fara neitt annað. Ég fer bara í hvern leik og geri mitt besta í þeirri von að það dugi til að halda sæti mínu."

Fletcher hefur tekið miklum framförum og er farinn að skila mörkum. Hann þakkar Sir Alex Ferguson fyrir það. „Knattspyrnustjórinn hefur verið mjög hvetjandi og sjálfstraust mitt hefur aukist gríðarlega," segir Fletcher.