Clichy hefur mikla trú á nýja fyrirliðanum

Gael Clichy er mjög ánægður með að Cesc Fabregas sé orðinn nýr fyrirliði Arsenal. Fabregas tekur við bandinu af William Gallas og telur Clichy þessa ákvörðun hjá knattspyrnustjóranum Arsene Wenger hreint frábæra.

„Þetta er merki um nýja tíma og ég vona að Cesc muni gera góða hluti. Reyndar er ég viss um að hann muni gera það. Hann hefur leikið frábærlega með liðinu síðustu ár og það var góð ákvörðun að gera hann að fyrirliða," sagði Clichy.

„Ég er viss um að allir leikmenn liðsins muni gefa honum þann stuðning sem hann þarf til að verða einn sá besti. Tony Adams var orðinn fyrirliði ungur að aldri og nú er hann talinn einn besti leikmaður sem leikið hefur í búningi félagsins. Ég vona að Cesc muni upplifa það sama."

„Þegar Cesc var að fá að spila fyrst þá voru margir sem sögðu að hann væri of ungur til að sýna þá ábyrgð sem þyrfti. En hann afsannaði það og getur gert það aftur," sagði Clichy sem notaði einnig tækifærið til að sýna Gallas stuðning.

„Ég ber virðingu fyrir William. Ég held að enginn sé ósammála því að hann er frábær leikmaður og hefur gert góða hluti fyrir liðið. Það sem gerðist er ekki hægt að taka til baka. Ég er ánægður með að hann er kominn aftur í hópinn og er viss um að við getum gert góða hluti."