Stóllinn að hitna undir Ince

Orðrómur er nú á kreiki um að Paul Ince hjá Blackburn verði næsti stjórinn til að verða rekinn í ensku úrvalsdeildinni.

Blackburn tapaði 3-1 fyrir Liverpool um helgina og hefur þar með ekki unnið sigur í síðustu tíu leikjum. Liðið situr í 19. og næstneðsta sæti deildarinnar.

Graeme Souness, fyrrum stjóri Blackburn, er einn þeirra sem orðaðir hafa verið við stjórastólinn hjá liðinu en stjórnarformaður Blackburn segir engar ákvarðanir um framtíð Ince liggja fyrir.

"Stjórnin mun taka ákvarðanir sem eru félaginu í hag," sagði John Williams stjórnarformaður í samtali við Lancashire Evening Telegraph.

Hann lýsti líka yfir ánægju sinni með stuðningsmenn liðsins sem gefast ekki upp þótt móti blási.

"Stuðningsmennirnir voru frábærir um helgina og ég held að enginn geti kvartað yfir því. Paul Ince minntist á það við mig sjálfur að þeir hefðu verið góðir."