Redknapp fékk ljót símtöl frá Portsmouth

Harry Redknapp, stjóri Tottenham, hefur fengið símtöl frá reiðum stuðningsmönnum Portsmouth sem hafa m.a. óskað honum og fjölskyldu hans þess að láta lífið í bílslysi.

Það vakti litla hrifningu stuðningsmanna Portsmouth þegar Redknapp yfirgaf félagið í snatri og skrifaði undir hjá Lundúnafélaginu í haust.

Hann var grýttur með eggjum þegar hann tók við heiðursverðlaunum í Portsmouth tveimur dögum eftir félagaskiptin, en hann gerði liðið að bikarmeistara á síðustu leiktíð.

Einhverjir af bitrustu stuðningsmönnum Portsmouth höfðu fyrir því að hafa upp á símanúmeri stjórans og dreifðu því á hvern þann sem hafði áhuga á að senda Redknapp kaldar kveðjur.

Þar á meðal var þess óskað að hinn 61 árs gamli Redknapp léti lífið í bílslysi og að hann fengi krabbamein.

Ian Darke, starfsmaður Sky fréttastofunnar sem er stuðningsmaður Portsmouth og vinur Redknapp, kallaði uppátæki stuðningsmanna Portsmouth brjóstumkennanleg.

Það þar ekki að taka það fram að stjórinn er búinn að skipta um símanúmer eftir ósköpin.