Hærri auglýsingatekjur í Þýskalandi en á Englandi

Þýska úrvalsdeildin í knattspyrnu hefur nú tekið fram úr þeirri ensku þegar kemur að tekjum af auglýsingum á keppnistreyjum.

Innkoma félaga af auglýsingasölu á búninga í sex stærstu deildum Evrópu hefur dregist saman í ár í fyrsta skipti í áratug.

Þrátt fyrir lausafjárkreppuna í heiminum eru það fjármála- og tryggingafyrirtæki sem eyða mestum fjármunum í slíkar auglýsingar.

Ráðgjafafyrirtæki á alþjóðamarkaði stóð fyrir rannsókn á tekjum félaga í deildunum sex og þar kom fram að þýska úrvalsdeildin halaði inn tæpar 103 milljónir evra í tekjur af auglýsingum á keppnistreyjum, en sú enska aðeins 85,5 milljónir evra.

Það hefur áhrif á niðurstöðurnar að pundið hefur veikst, en þó hefur þýska úrvalsdeildin líka verið í mikilli sókn.

Til marks um viðsnúninginn í hefur Bayern Munchen nú tekið fram úr Manchester United sem það félag sem fær mestar tekjur af auglýsingum á búningum sínum.

Bayern halaði inn 20 milljónir evra fyrir sínar auglýsingar, en United 17,7 milljónir. United hafði árið áður 20,8 milljónir evra í tekjur, en lækunina má að mestu skrifa á veikingu pundsins.

Í þessari úttekt kom fram að auglýsingatekjur á borð við þær sem lýst var hér að ofan hafa farið úr 55 milljónum evra í 70 milljónir evra í ítölsku A-deildinni á síðustu tveimur árum.

Heildartekjur félaga í deildunum sex hafa dregist lítillega saman á síðasta ári, voru 393 milljónir evra í ár en um 405 milljónir í fyrra.

Alls bera 34 lið í deildunum auglýsingar fjármála- eða tryggingafyrirtækja.