Samkomulag ljósmæðra hefur áhrif á kjaradeilu lækna

Málamiðlunartillaga ríkissáttasemjara sem ljósmæður samþykktu fyrir stundu hefur bein áhrif á kjaradeilu lækna og samninganefndar ríkissins en næsti fundur í viðræðunum hefst eftir nokkrar mínútur.

Í lok júlí felldu félagsmenn í Læknafélagi Íslands kjarasamning við ríkið en mikil óánægja var með samninginn meðal ungra lækna.

Aðspurður hvort samkomulag ljósmæðra hafi áhrif á kjaradeilu lækna segir Gunnar Ármannsson, framkvæmdastjóri Læknafélagsins og formaður samninganefndarinnar: ,,Það fyrsta sem við sjáum er að sá launaflokkur sem ljósmæður sem eru að hefja störf eftir nám raðast langflestar í gefur hærri laun en fyrsti flokkur gefur lækni sem er búinn að ljúka sex ára háskólanámi og einu kandídatsári. Þannig að samkomulag ljósmæðra hefur vissulega áhrif á okkar viðræður."

Gunnar segist vera afskaplega ánægður fyrir hönd ljósmæðra og kveðst jafnframt vera bjartsýnn fyrir fundinn. Það sama hljóti að ganga yfir allar heilbrigðisstéttir.