Ekki smart tími fyrir launahækkun forstjóra LSH

Formaður Læknafélags Íslands segir það ekki góða tímasetningu að laun forstjóra Landspítalans skuli vera hækkuð um fjórðung á sama tíma og læknar og ljósmæður standi í erfiðum samningaviðræðum.

Fram kom í Fréttablaðinu í gær að laun forstjórans hækka um 25 prósent þegar nýr forstjóri tekur við í haust. Það er samkvæmt ákvörðun kjararáðs. Við breytinguna verða laun forstjórans ríflega 1,6 milljón króna.

Elsa B. Friðfinnsdóttir, formaður Félags íslenskra hjúkrunarfræðinga, sagði hækkunina ríflega og þá sagði Guðlaug Einarsdóttir, formaður Ljósmæðrafélags Íslands, að ljósmæður þyrftu engu að kvíða, nægir peningar virtust vera til á Landspítlanum.

„Maður veltir fyrir sér hvort það sé betra að heyra undir kjararáð," segir Birna Jónsdóttir, formaður Læknafélags Íslands, um hækkunina. „Mér finnst þetta alls ekki smart tími í ljósi þess að ljósmæður eru að fara í aðgerðir og í ljósi þess smánarlega boðs sem okkur er gert," segir Birna og vísar til kjaradeilu lækna við samninganefnd ríkisins. Birna segir tilboð ríkisins ekki halda í við verðbólguna. „Við erum að taka á okkur kjaraskerðingu."

Aðspurð hvort fréttin af launahækkun forstjórans breyti einhverju varðandi kjaraviðræður lækna og ríkisins á Birna ekki von á því. Það sé ekki viðsemjandi lækna, samninganefnd ríkisins, eða ríkissáttasemjari sem hafi hækkað laun forstjóra Landspítalans heldur kjararáð. „Þetta er nú samt sami vinnuveitandi," minnir Birna á.