Árásir Ísraela halda áfram - 270 látnir

Ísraelsher hélt áfram að varpa sprengjum á Gaza í morgun og nú hafa um 270 manns fallið og yfir sex hundruð særst frá því árásirnar hófust í gærdag.

Gerðar hafa verið yfir þrjátíu árásir á Gaza það sem af er degi, en stuðningsmenn Hamas samtakanna hafa einnig skotið um tíu eldflaugum yfir til Ísraels, en án þess að valda þar manntjóni í dag, en í gær féll einn maður í slíkri eldflaugaárás.

Öryggisráð Sameinuðu þjóðanna kom saman í gærkvöldi og lýsti áhyggjum sínum af ástandinu og hvatti til vopnahlés.

Árásir Ísraelsmann miða aðallega á skotmörk sem þeir telja hernaðarlega mikilvæg, eins og þjálfunarstaði Hamasliða, lögreglustöðvar og stjórnsýslubyggingar. Engu að síður hefur nokkur fjöldi óbreyttra borgara fallið og særst. Þá hafa Ísraelsmenn stillt upp skriðdrekum skammt utan við Gaza, til að vera reiðubúnir í landhernað, sem þó er talinn ólíklegur enn sem komið er.

Kosningar eru í Ísrael í febrúar og telja sumir fréttaskýrendur að það kunni að hafa áhrif á ákvarðanir stjórnmálamanna þar um hernaðinn á Gaza.

Forseti Írans hefur fordæmt árásir Ísraelsmanna og segir þær glæpsamlegar. Hann sagði að Íranar myndu standa við bakið á Palestínumönnum og hvatti alþjóðasamfélagið til að gera slíkt hið sama.