Telur að umheimurinn hafi skilning á aðgerðum Ísraela

Tzipi Livni, utanríkisráðherra Ísraels, telur að Telur að umheimurinn hafi skilning á aðgerðum Ísraela á Gazasvæðinu. Tala fallinna í loftárásum Ísraelshers á Gaza í dag fer stighækkandi og nú er talið að um tvö hundruð manns hafi fallið og á fjórða hundrað manns hafi særst.

Livni réttlætti árásirnar í dag með því að þær væru svar Ísraela við eldflaugaárásum stuðningsmanna Hamas á Ísrael. Hún sagðist hafa fulla trú á því að umheimurinn hefði skilning á aðgerðum Ísraelsmanna, enda væru þeir að verja þjóð sína fyrir árásum öfgasinnaðra íslamista, sem breiddu út hatur í þessum heimshluta með stuðningi stjórnvalda í Íran.

Talsmenn Hamas fordæma loftárásirnar og segja þær hafa bitnað á saklausum borgurum, eins og konum og börnum og hóta hefndum. Loftárásirnar í dag eru fordæmalausar en alls hefur verið ráðist á um eða yfir 30 skotmörk og boða Ísraelsmenn að þetta sé aðeins upphafið að því sem koma skal.