Flýja til Sviss vegna ruslahauga í Napólí

Par frá Napólí á Ítalíu hefur sótt um hæli í Sviss þar sem það óttast á ruslið á götum Napólí muni skaða ófætt barn þeirra.

Eftir því sem svissneska dagblaðið Blick greinir frá hefur parið sótt um að setjast að í bænmum Bellinzona sem er á landamærum Sviss og Ítalíu. „Ef við dveljum áfram í Napólí munum við deyja úr krabbameini," hefur Blick eftir manninum sem segir að stórhættulegum efnum sé hent á víðavangi í borginni. „Við verðum að bjarga barninu okkar," segir maðurinn, en kona hans er komin fjóra mánuði á leið.

Fréttir af rusli hlöðnum götum Napólí hafa borist um heimsbyggðina að undanförnu. Þar eru allar sorpvinnslustöðvar yfirfullar og engin leið að losna við ruslið að sögn yfirvalda.