Rooney hefur ekki áhyggjur af miðlungsliði City

Framherjinn Wayne Rooney hjá Manchester United segir mikilvægt að liðið nái að leggja granna sína í City að velli í einvígi liðanna á borgarleikvangnum í Manchester á sunnudag.

Rooney missti af báðum leikjum liðanna í deildinni á síðustu leiktíð, en þá hafði City betur í báðum leikjunum.

"Leikurinn á sunnudaginn er risastór og við skuldum stuðningsmönnunum sigur í þessu einvígi - jafnvel þó við höfum unnið tvo bikara á síðustu leiktíð. Það var súrt að tapa báðum leikjunum í fyrra og það væri fínt að sýna City mönnum að við séum enn kóngarnir í Manchester," sagði Rooney.

Hann játaði að City hefði fengið mikla athygli síðan félagið var selt á sínum tíma, en lét í það skína að langt væri í að liðið ógnaði stóra bróður í United.

"Það fer ekki í taugarnar á okkur að City skuli vera svona mikið í umræðunni. Það myndi vera svekkjandi ef þeir væru að vinna titla, en á meðan liðið er bara um miðja deild - er ég ekki að eyða tíma í að hafa áhyggjur af því," sagði Rooney.