Wright-Phillips er í rangri stöðu hjá Chelsea

Fyrrum þjálfari Shaun Wright-Phillips hjá Manchester City segir að Chelsea sé ekki að fá nógu mikið út úr leikmanninum af því hann sé ekki notaður rétt.

Wright-Phillips gekk í raðir City þegar hann var aðeins 15 ára gamall og vann sér ungur sæti í byrjunarliðinu. Hann sló í gegn hjá City og var í kjölfarið seldur til Chelsea á metfé.

Hann hefur aldrei náð að festa sig almennilega í sessi hjá Chelsea og gamli þjálfarinn hans segir það vegna þess að hann sé ekki notaður rétt.

"Chelsea á enn eftir að sjá það besta frá Shaun, því hann er bestur á miðjunni þar sem hann kemur vörnum andstæðingana hvað eftir annað í mikil vandræði með hraða sínum og leikni. Þar er hann betri en þegar hann spilar á vængnum," sagði Jim Cassell, yfirmaður knattspyrnuakademíu City.

"Fólk segir að ég hafi gert Shaun gott þegar hann var hérna, en það rétta er að hann gerði okkur gott. Hann er frábær strákur og góður leikmaður og hann var fyrsti maðurinn sem sló í gegn eftir að hafa komið í gegn um akademíuna okkar."