Endurkomu Neville seinkar

Bakvörðurinn Gary Neville spilar ekki með varaliði Manchester United gegn Liverpool í kvöld eins og til stóð þar sem hann þykir ekki hafa náð sér nógu vel af meiðslum sínum.

Neville hefur ekki spilað síðan í mars vegna ökkla og kálfameiðsla, en næsti varaliðsleikur United er ekki fyrr en í nóvember og því er hætt við að Neville komi ekki við sögu með aðalliðinu í þessum mánuði.

Forráðamenn United ítreka að bakverðinum hafi ekki slegið niður í endurhæfingu sinni, en segja ákvörðunina á að halda honum frá leiknum í kvöld vera tekna í varúðarskyni.

Miðjumaðurinn Darren Fletcher átti líka að spila gegn Liverpool í kvöld en hann hefur líka verið tekinn út úr liðinu. Hann er að ná sér af hnémeiðslum.