Mótmæli settu svip á ferðina

George W. Bush, forseti Bandaríkjanna, lauk í gær sjö daga heimsókn sinni í Suður-Ameríku. Ofbeldisfull mótmæli einkenndu ferðina sem virðist aðallega hafa verið táknræn og til þess að bæta tengsl við álfuna þar sem engir nýir samningar voru gerðir.

Undanfarin ár hafa vinstrisinnaðir leiðtogar komist til valda víða um Suður-Ameríku, oft með málflutningi sem beinist gegn stjórnvöldum í Bandaríkjunum.

Meðan á heimsókn Bush stóð ferðaðist einn helsti gagnrýnandi Bush, hinn vinstrisinnaði forseti Venesúela, Hugo Chavez, einnig um ríki Suður-Ameríku og hæddist að stefnu Bandaríkjaforseta. Bush endaði ferðina í nágrannaríkinu Mexíkó þar sem pólitískir hagsmunir Bandaríkjanna eru hvað mestir. Óeirðaástand braust út í Mexíkóborg í gær þegar mótmælendur slógust við óeirðalögreglu fyrir framan bandaríska sendiráðið í Mexíkóborg, grýttu hótelið sem Bush dvaldi á og brenndu bandaríska fánann meðal annars.

Helsta gagnrýnin á Bush beinist að hertri innflytjendalöggjöf í Bandaríkjunum og stefnu bandarískra stjórnvalda varðandi stríðið í Írak. Andúð í garð Bandaríkjanna jókst til muna eftir að Bush undirritaði frumvarp um að koma upp hundruð kílómetra langri girðingu, vegatálmum og innrauðum myndavélum á landamærum Bandaríkjanna og Mexíkó.