Ég skal segja ykkur hvað áhyggjur eru

Breska blaðið The Sun spurði framherjann Alan Smith hjá Newcastle í gær hvort hann væri ósáttur við að hafa misst stöðu sína í enska landsliðinu í hendur Emile Heskey.

"Hef ég áhyggjur af því að missa sætið í enska landsliðinu? Ég skal segja ykkur hvað áhyggjur eru. Áhyggjur er það að sitja heima í stofu og velta því fyrir sér hvort maður geti yfir höfuð spilað fótbolta aftur eins og ég gerði í meiðslum mínum fyrir ári. Það eru áhyggjur," sagði Smith, sem hefur verið notaður sem miðjumaður hjá Newcastle síðan hann gekk í raðir félagsins frá Manchester United í sumar.

"Ekki misskilja mig - ég vil að sjálfssögðu spila fyrir England - en landsliðsþjálfarinn ræður þar ferðinni. Það er svekkjandi að vera ekki í hópnum en kannski getur sú staðreynd hjálpað mér að komast inn aftur að ég get spilað bæði á miðjunni og í framlínunni. Reyndar spilaði ég aðeins einn leik sem framherji á þessari leiktíð og það var í landsleiknum gegn Þjóðverjum," sagði Smith.