West Ham svarar Joorabchian

Forráðamenn West Ham blása á ummæli Kia Joorabchian frá því í gærkvöldi þegar hann sakaði félagið um að hafa svikið gefin loforð í máli framherjans Carlos Tevez. Félagið svaraði hinsvegar fullum hálsi í dag og segir að allir samningar sem Joorabchian hafi gert við West Ham um leikmanninn hafi verið við fyrrum stjórnarmenn félagsins og fullyrða að leikmaðurinn sé að fullu samningsbundinn félaginu.

Joorabchian vill meina að hann eigi enn rétt á leikmanninum, en West Ham bendir á að félagið hafi gert við hann samning og hafi þegar borgað háa sekt vegna tengsla hans við Joorabchian - sem standast ekki reglur úrvalsdeildarinnar.

Nú hefur Alþjóða Knattspyrnusambandið skorist í leikinn og ljóst að þráttað verður um málið á næstu vikum. Óvíst þykir að leikmaðurinn geti gengið í raðir Manchester United eins og til stóð - og hvort hann verði þá orðinn löglegur með liðinu þegar leiktíðin hefst á Englandi í næsta mánuði.