Kaboul skilinn eftir heima

Franski miðvörðurinn Younes Kaboul hjá Tottenham er greinilega fallinn úr náðinni hjá Juande Ramos, stjóra Tottenham. Kaboul er ekki í hópi Tottenham sem sækir Anderlecht heim í Evrópukeppni félagsliða í kvöld.

Það myndi venjulega ekki sæta tíðindum nema hvað Tottenham fer þá í leikinn með aðeins inn miðvörð í hópnum og ljóst að bakvörðurinn Pascal Chimbonda eða miðjumaðurinn Didier Zokora þarf að fylla skarð Frakkans unga í vörninni.

Kaboul hefur gert nokkur dýr mistök í síðustu leikjum liðsins og gaf þar á meðal ódýra vítaspyrnu í tapi liðsins gegn Birmingham á dögunum.

Ramos fullyrðir að Kaboul eigi sér framtíð í liðinu þrátt fyrir fremur slaka byrjun, en hann var keyptur á 7,8 milljónir punda frá Auxerre í sumar og hefur verið fyrirliði allra yngri landsliða Frakka.