Lippi neitaði Birmingham

Marcello Lippi neitaði tilboði enska úrvalsdeildarfélagsins Birmingham um að gerast knattspyrnustjóri félagsins. Þetta segir stjórnarformaður enska félagsins í samtali við Daily Mail í dag. Lippi hefur verið í fríi síðan hann gerði Ítali að heimsmeisturum í fyrrasumar.

"Við gerðum honum tilboð sem hann hafnaði. Þetta er enginn skrípaleikur af okkar hálfu, hér var um raunverulegt tilboð að ræða," sagði David Sullivan, en einhverjum hefur ef til vill þótt félagið stefna heldur hátt í metnaði sínum.

Í gær bárust fréttir af því að fyrrum stjóri Tottenham, Martin Jol, hefði hafnað tilboði frá félaginu.

Lippi gerði Juventus fimm sinnum að ítölskum meisturum og fór með það fjórum sinnum í úrslit Evrópukeppninnar - sem liðið vann árið 1996. Lippi hefur aldrei starfað utan Ítalíu.