Lee Bowyer er leikmaður 13. umferðarinnar

Lee Bowyer átti stórleik fyrir West Ham þegar liðið rústaði Derby, 5-0, þrátt fyrir að vera kvalinn vegna kviðslits.

Bowyer gekkst undir aðgerð í gær vegna meiðslanna og verður hann af þeim sökum frá næstu vikurnar.

Hann á skrautlegan feril að baki en er líklega þekktastur fyrir afrek sín með Leeds þegar félagið náði sínum besta árangri um aldamótin.

Árið 2003 gekk hann til liðs við West Ham en staldraði aðeins við í sex mánuði þar sem liðið féll úr úrvalsdeildinni um vorið. Í kjölfarið samdi hann við Newcastle þar sem hann var í þrjú tímabil.

Þar þótti hann sjaldan standa undir þeim væntingum sem gerðar voru til hans og minnistæðast er væntanlega slagsmálin sem hann átti við Kieron Dyer í leik við Aston Villa í apríl árið 2005.

Bowyer var í kjölfarið sektaður um sex vikna laun og dæmdur í þriggja leikja bann.

Hann hefur margsinnis komist í kast við lögin sem frægt er en er nú loksins búinn að koma sér á rétta braut. Hann hefur átt góðu gengi að fagna á tímabilinu hjá West Ham sem hann gekk til liðs við öðru sinni í júní árið 2006.

Hann er nú kominn aftur undir stjórn þjálfarans sem mótaði hann fyrstu árin í boltanum. Hér er átt við Alan Curbishley sem var áður knattspyrnustjóri Charlton, þar sem Bowyer hóf feril sinn áður en hann gekk til liðs við Leeds árið 1996.

„Það eina sem ég vil gera er að spila fótbolta með West Ham og vonandi held ég áfram á þessari braut," sagði Bowyer sem er nú þrítugur.

Frammistaða hans hefur vakið það mikla athygli að fjölmiðlamenn í Englandi eru nú farnir að orða hann við landsliðssæti. Sjálfur efast um að kallið eigi eftir að koma frá Steve McClaren landsliðsþjálfara.

„Ég held að ég verði aldrei aftur valinn í landsliðið," sagði hann en hann hefur einu sinni spilað landsleik, árið 2002. „Ég tel það því mikilvægast fyrir mig að standa mig vel fyrir West Ham."

Nafn: Lee David Bowyer

Fæddur: 3. janúar 1977 í Newham í Lundúnum.

Félög: Charlton, Leeds, West Ham og Newcastle.

Númer: 29