Strákurinn var óheppinn

Sir Alex Ferguson viðurkenndi að rauða spjaldið sem David Dunn fékk í leik Manchester United og Blackburn í dag hefði verið strangur dómur.

Cristiano Ronaldo gerði gæfumuninn fyrir United í dag þegar hann skoraði tvö mörk með stuttu millibili og eftir að Dunn var rekinn af velli áttu gestirnir litla von um stig á Old Trafford.

"Þeir eru með gott lið, á því leikur enginn vafi," sagði Ferguson um lærisveina fyrrum leikmanns síns, Mark Hughes. "Leikurinn var frekar jafn í fyrri hálfleik en mörkin í þeim síðari gerðu út um leikinn," sagði Ferguson og sagðist skilja gremju gestanna út af rauða spjaldinu sem Dunn fékk eftir að fá að líta tvö ódýr gul.

"Strákurinn var óheppinn. Hann reyndi að lesa hlaupið hjá Saha en felldi hann," sagði Ferguson í samtali við Sky. Hann tók sér líka tíma til að hrósa gamla refnum Ryan Giggs sem lagði upp fyrra mark United. Hann segir það hjálpa honum að vera hættur með landsliðinu.

"Ryan spilaði ekki á miðvikudaginn og nú fær hann vikufrí fyrir leikinn gegn Bolton. Það hefur tvímannalaust hjálpað honum mikið að hætta með landsliðinu og þó hann sé að verða 34 ára gamall í næsta mánuði, sýndi hann að hann er mjög ferskur og á örugglega nokkur ár enn inni," sagði Ferguson.