Ánægðastur með að halda hreinu

Guus Poyet, aðstoðarstjóri Tottenham, sagðist fyrst og fremst ánægður með að hans menn hefðu náð að halda hreinu í dag þegar liðið burstaði Wigan 4-0 og fjarlægðist fallsvæðið enn frekar.

Jermaine Jenas skoraði tvö mörk og þeir Darren Bent og Aaron Lennon sitt markið hvor í dag og var allt annað að sjá til liðsins en verið hefur í byrjun leiktíðar.

"Þetta var allt annað. Það var auðvitað fínt að fá þessi mörk en það var ekki síður mikilvægt að halda hreinu aftur. Góð lið verða fyrst og fremst að vera þétt í varnarleiknum og þaðan er hægt að sækja - og þar erum við sterkir með menn eins og Jenas, Berbatov, Lennon og Keane," sagði Poyet.

Búlgarinn Berbatov hefur verið mikið í blöðunum undanfarið þar sem sífelldur orðrómur var uppi um að hann væri ósáttur hjá liðinu og vildi fara frá Tottenham.

"Ég er ekki hissa á því að Berbatov sé orðinn dálítið þreyttur á fjölmiðlaumfjölluninni undanfarið þar sem verið er að ljúga upp á hann. Við erum hinsvegar búnir að ræða við hann, hann er ánægður og við verðum sannarlega ánægðir með hann ef hann spilar áfram eins og hann gerir í dag," sagði Poyet, aðstoðarmaður Juande Ramos.