Eriksson tjáir sig ekki um Eið Smára

Sven-Göran Eriksson vill ekkert gefa upp um áformuð leikmannakaup sín hjá Manchester City þegar félagskiptaglugginn opnast í janúar. Fjöldi leikmanna hafa verið orðaðir við City undanfarið og þar á meðal Eiður Smári Guðjohnsen hjá Barcelona.

Breskir fjölmiðlar hafa orðað fjölda leikmanna við City og þar á meðal eru Christian Poulsen hjá Sevilla, framherjinn Alfonso Alves hjá Heerenveen og svo Eiður Smári Guðjohnsen.

"Þetta eru allt frábærir leikmenn en ég tjái mig ekkert um málið núna," sagði Eriksson í samtali við Manchester Evening News. "Það eina sem ég segi og hef alltaf sagt, er að ef við sjáum góða leikmenn sem eru á lausu í janúar - þá er til peningur til að kaupa þá," sagði Eriksson.