Armréttur og Allardyce hjá Guðna á morgun

Það verður mikið um að vera í þættinum 4-4-2 með Guðna Bergs og Heimi Karls á Sýn 2 á morgun. Þar þarf Guðni Bergsson að standa við gefið loforð og tekur svo símaviðtal við Sam Allardyce, stjóra Newcastle.

Heimir lét Guðna lofa því í þættinum um daginn að hann tæki 10 armréttur uppi á borðinu í beinni útsendingu ef Bolton næði ekki að sigra Aston Villa í deildarleik liðanna. Leiknum lauk með jafntefli og þá er bara spurning hvort Guðni standi við stóru orðin á morgun.

"Það verður bara að koma í ljós," sagði Guðni þegar Vísir náði tali af honum. "Ég vissi ekki hvaðan á mig stóð veðrið þegar þessu var troðið upp á mig og þetta er nú bara dæmi um það hvað hann heimir getur verið mikill vitleysingur," sagði Guðni hlæjandi.

"Það var ekki annað að gera en að taka þessari áskorun fyrir hönd míns liðs, en ég mun ná að hefna mín á Heimi á einn eða annan hátt. Hefndin verður grimmileg - því lofa ég," sagði Guðni.

Hann ætlar að taka símaviðtal við Stóra-Sam Allardyce hjá morgun og segist vera feginn að lið hans Newcastle náði jafntefli í grannaslagnum við Sunderland í dag. "Það var eins gott, því maður vill ekki að hann verði of fúll. Við ætlum að ræða við hann um það hvernig það var að taka við Newcastle þar sem væntingarnar eru miklar. Við spyrjum hann hvaða markmið hann hafi sett sér með þetta lið og svo munum við aðeins ræða málefni enska landsliðsins og toppbaráttuna á Englandi," sagði Guðni.

Þátturinn 4-4-2 hefst klukkan 19:10 á Sýn 2 á morgun og þá er bara að sjá hvort Guðni stendur við stóru orðin.