Vilja fleiri varamenn

Manchester United og Tottenham vilja að fleiri varamenn verði heimilaðir í ensku úrvalsdeildinni. Í dag er gefið leyfi fyrir fimm leikmönnum á varamannabekknum en fyrrnefnd félög vilja að þeim verði fjölgað í sjö.

Í Meistaradeild Evrópu og í landsleikjum er sá háttur hafður á að leyfi er fyrir sjö menn á bekknum og þrír af þeim mega koma inn á. Sama á við um nokkrar deildir í Evrópu, þar á meðal Landsbankadeildina hér á Íslandi.

„Öll félög eru með leikmannahópa með fleiri en sextán leikmönnum," segir Sir Alex Ferguson, knattspyrnustjóri Manchester United. „Til dæmis gat ég ekki valið Darren Fletcher í hópinn fyrir leikinn gegn Arsenal. Það var erfitt fyrir hann og mig líka."

Sven-Göran Eriksson, stjóri Manchester City, er einnig baráttumaður fyrir því að fjölgað verði á varamannabekkjum ensku úrvalsdeildarinnar.

Talsmaður enska knattspyrnusambandsins segir að málið verði skoðað. Til að nýjar reglur taki gildi þurfa 14 af 20 liðum ensku úrvalsdeildarinnar að kjósa með þeim.