Farsakennd tímasóun hjá McClaren

Terry Butcher, fyrrum fyrirliði enska landsliðsins, segir að ákvörðun Steve McClaren landsliðsþjálfara Englendinga að fara til Bandaríkjanna til að sjá David Beckham spila góðgerðaleik geti ekki talist annað en lélegur brandari.

McClaren fylgdist með Beckham spila góðgerðaleik LA Galaxy gegn sérstöku stjörnuliði - sem Galaxy vann 12-4. Butcher þykir þetta "farsakennd tímasóun."

"Hvað átti Beckham eiginlega að sýna landsliðsþjálfaranum í svona leik," sagði Butcher gáttaður.

David Beckham sagðist hafa skemmt sér vel í leiknum, en hann vonast til þess að vera inni í myndinni hjá landsliðsþjálfaranum fyrir síðustu leiki Englendinga í undankeppni EM.

Enska liðið mætir Austurríkismönnum í æfingaleik 16. nóvember og spilar svo algjöran úrslitaleik í undankeppni EM gegn Króötum. Englendingar verða að treysta á að Rússar nái ekki að leggja Ísraela fjórum dögum áður til að eiga möguleika á að komast á EM.