Drogba bauð við Chelsea

Didier Drogba segir í nýútkomnum DVD-diski að hann hafi fengið óbragð í munninn þegar hann samdi við Chelsea í júlí árið 2004.

„Það bauð við mér,“ sagði hann í viðtali á disknum. „Ég gerði mér grein fyrir því að mér bauð við því að skrifa undir hjá Chelsea. Það er erfitt að útskýra það.“

Mynddiskurinn ber nafnið 'The Incredible Destiny of Didier Drogba' og er óljóst hvenær viðtalið var tekið.

Hann sagði nýverið í viðtali að hann vildi fara frá Chelsea en sá síðar eftir þeim ummælum. Hann hefur neitað að tjá sig um viðtalið á mynddisknum nú.

Drogba sagði enn fremur að hann hafi ekki viljað fara frá Marseille á sínum tíma. Hann sagði að þegar hann gekkst undir læknisskoðun hafi hann vonast til þess að eitthvað hefði komið í ljós sem hefði gert það að verkum að ekkert yrði að félagsskiptunum.