Jol gagnrýnir vinnubrögð Comolli

Hollendingurinn Martin Jol hefur nú varpað ljósi á nokkur atriði sem urðu þess valdandi að hann fór frá Tottenham á dögunum. Í viðtali hans við Sun kemur fram að erfitt samstarf hans við Damien Comolli var ein af ástæðunum fyrir því að allt fór í hundana hjá félaginu.

Margir settu þannig stór spurningamerki við innkaupin hjá Tottenham í sumar þar sem kaupin á framherjanum Darren Bent fyrir á átjándu milljón punda vöktu furðu stuðningsmanna liðsins.

Martin Jol segist ekki hafa átt gott samstarf við Damien Comolli, yfirmann knattspyrnumála hjá Tottenham, en hafi fundið sig mun betur með forvera hans Frank Arnesen - sem elti aurinn yfir til Chelsea á sínum tíma.

"Mér þótti allt benda til þess að þessi kaup í sumar myndu koma ójafnvægi á leikmannahópinn og það kom á daginn," sagði Jol. Það fyndna er að nýi stjórinn á eflaust eftir að rekast á nákvæmlega sama vandamál fljótlega og því held ég að félagið eigi eftir að taka sig til í janúar og kaupa leikmenn í stöðurnar sem ég vildi fá menn í á sínum tíma," sagði Jol.

Hann vildi kaupa reynda miðjumenn inn í hópinn og skal engan undra, því leikur liðsins hefur verið afleitur til þessa á tímabilinu - allt frá markvörslu til sóknar.

"Þegar Frank Arnesen var hérna ræddum við vel saman um þá leikmenn sem okkur langaði að fá til félagsins en ég átti ekki sama góða sambandið við Comolli. Ég held að hann hafi fyrst og fremst viljað kaupa unga leikmenn til að gera úr þeim góða fjárfestingu í framtíðinni - en ekki til að styrkja liðið núna. Ég komst að þessu í sumar og vissi strax þá að staða mín yrði erfið," sagði Jol.