Gary Neville að verða klár

Reikna má með því að Gary Neville, fyrirliði Manchester United, muni leika með varaliði félagsins í vikunni. Þessi 32 ára hægri bakvörður hefur ekki leikið neitt á þessu tímabili vegna meiðsla.

„Það var hrikalegt að missa af lokahluta síðasta tímabils og enn meira svekkjandi að fara meiddur inn í yfirstandandi tímabil. Vonandi er þessu lokið núna og ég get farið að horfa fram á veginn," sagði Neville.

Það er því stutt í að stuðningsmenn Manchester United fái að sjá Neville í eldlínunni á ný. Það er þó ólíklegt að það gerist á laugardaginn þegar United leikur gegn Arsenal.

Meiri líkur eru á því að Neville verði í leikmannahópi United í næstu viku þegar liðið mætir Dynamo Kiev í Meistaradeildinni.

Þess má geta að Manchester United tilkynnti í dag að Rio Ferdinand yrði klár í slaginn fyrir leikinn gegn Arsenal.