Leikmaður Stoke laus úr fangelsi

Vincent Pericard hefur verið sleppt lausum úr fangelsi en hann var í ágúst síðstliðnum dæmdur í fjögurra mánaða fangelsi.

Dóminn fékk hann fyrir að hindra framgang réttvísinnar þegar hann laug því að stjúpfaðir hans hafi verið að keyra bíl hans þegar hann var stöðvaður af lögreglu fyrir að vera á meira en 16m km/klst hraða.

Pericard var sleppt fyrr í mánuðinum en þá með eftirlitstæki um ökklann á sér. Honum var hent aftur í steininn þann 12. október síðastliðinn eftir að upp komst að ökklabandið hafi „dottið" tvisvar af í sömu vikunni.

Frakkinn Vincent Pericard vakti fyrst athygli þegar Juventus keypti hann árið 2000 þar sem hann var í þrjú ár, þar af síðasta árið í láni hjá Portsmouth. Hann samdi svo við Portsmouth árið 2003 en var leystur undan samningi árið 2006. Þá samdi hann við Stoke City.

Á síðustu leiktíð skoraði hann tvö mörk í 29 leikjum með Stoke.