Newcastle vann Tottenham

Tottenham er enn í fallsæti í ensku úrvalsdeildinni en liðið fór fýluferð til Newcastle í dag. Heimamenn unnu 3-1 sigur og styrktu stöðu sína í áttunda sæti deildarinnar.

Rétt fyrir hálfleik kom Obafemi Martins liði Newcastle yfir með fyrsta marki leiksins. Hann skoraði framhjá Radek Cerny sem stóð í marki Tottenham í fjarveru Paul Robinson.

Claudio Cacapa skoraði annað mark Newcastle með skalla snemma í seinni hálfleik. Á 56. mínútu náði Robbie Keane að laga stöðuna fyrir Tottenham og staðan 2-1.

James Milner innsiglaði síðan 3-1 sigur Newcastle með ansi laglegu marki tæpum tuttugu mínútum fyrir leikslok. Varnarleikur Tottenham í leiknum var ansi götóttur.

Enn eitt áfallið fyrir Tottenham sem hefur leikið langt undir væntingum í upphafi tímabils. Sæti Martin Jol, knattspyrnustjóra liðsins, er orðið ansi heitt og ekki ólíklegt að hann verði þriðji stjóri deildarinnar sem þarf að taka pokann sinn þetta tímabil.