Diarra hugsar sér til hreyfings

„Ég hef leikið meira fyrir landslið mitt en félagslið, það er bara fáránlegt," segir Lassana Diarra sem hefur fengið ansi fá tækifæri síðan hann gekk í raðir Arsenal. Hann var keyptur frá Chelsea undir lok félagaskiptagluggans í ágúst.

„Ég var ósáttur við hve fá tækifæri ég fékk hjá Chelsea og það var ein af ástæðunum fyrir því að ég ákvað að skipta. Ég ætla mér ekki að vera varamaður út feril minn," segir miðjumaðurinn knái.

„Ef ég fæ ekki að spila þá verð ég að skoða mína stöðu. Evrópumót landsliða er á næsta leyti og ef ég ætla að spila með franska landsliðinu þar þá verð ég að fá að spila með félagsliði mínu."