Slysalegt sjálfsmark Gordon

West Ham vann í dag 3-1 sigur á Sunderland í eina leik dagsins í ensku úrvalsdeildinni.

Carlton Cole kom West Ham yfir strax á níundu mínútu með laglegum skalla en Kenwyne Jones jafnaði metin með öðrum laglegum skalla í seinni hálfleik.

Skömmu síðar átti Nolberto Solano skot í stöng og fór boltinn í fót Craig Gordon markvarðar Sunderland og í markið fór boltinn.

Craig Bellamy innsiglaði svo sigur West Ham með laglegu marki í lok leiksins.

„Við vorum með heppnina með okkur en einhverntímann hefðum við ekki fengið neitt úr svona leik þó svo að við ættum meira í leiknum,“ sagði Alan Curbishley, stjóri West Ham.

Roy Keane var alls ekki sáttur í leikslok. „Hver er sinnar gæfu smiður og verðum við að hætta að gefa andstæðingum okkar svona ódýr mörk.“